Xa temos cuestionario

 

O noso panda está durmindo pero nós non. Xa temos o cuestionario en socrative e estamos lanzándoo nas distintas clases do centro. 

Á volta de vacacións comezaremos a analizar resultados.

Que hai de xenes e ambiente nas enfermidades psiquiátricas?

 

O próximo día 10 de xaneiro teremos a sorte de contar co Dr Ángel Carracedo para falar dunha das grandes epidemias do noso século, as enfermidades mentais. Estades todos invitados, só tedes que escribir un correo

Pero había moito que limpar

 Continuamos coa limpeza do acuario. Tras retirar a auga do acuario e limpar a conciencia as paredes do mesmo, quedaba a parte menos agradable, limpar o filtro. Este levaba varios anos parado e sen limpar. O alumnado de 2º de FPB de Automoción fixo o traballo. Desmontaron o filtro e limpárono. Non foi doado, xa que o cheiro era bastante intenso, pero demostraron unha gran profesionalidade.

Despois montamos o filtro novamente pero, cando quixemos arrincalo, non funcionaba. Xa estabamos convencidos de que deberíamos mercar unha bomba nova cando apareceu Javier, o profesor de Auto, que tras unha hora intentando cebar a bomba, conseguiu que arrincase. Moitas grazas, Javier!

Nos próximos días procederemos a encher o acuario para que se vaian creando unhas condicións óptimas para a vida e así, á volta do Nadal, introducir as nosas primeiras especies.

 

Un pouco de limpeza non fai mal a ninguén

 

Tras recibir a primeira formación para a creación do noso acuario mariño de litoral, hoxe comezamos a limpeza do acuario. Levaba anos cos mesmos habitantes, unas carpas que marcharon para outros fogares, xa que foron moitos os alumnos interesados en levarse algunhas.

Primeiramente houbo que baleiralo e procedemos despois a limpalo. Para iso contamos coa inestimable axuda da profesora Susana e dos alumnos Xandre e Martín.

Aprendemos sobre o acuario mariño de litoral

 

Rematando novembro xuntámonos un grupo de 7 alumnos e 4 profesoras para recibir a primeira formación para a creación do noso acuario mariño de litoral.

A formación correu ao cargo de Martín Sobrado, experto en acuicultura. Informounos de como crear o acuario: como limpalo, como enchelo (debemos decidir se traemos auga do mar ou se a collemos da billa e a descloramos),  a utilización dos filtros axeitados, o tipo de comida que se lles debe dar aos peixes de auga salgada (xa que hai especies vexetarianas), cales son os niveis óptimos de nitratos, nitritos, amoníaco, etc. do acuario e como medilos e, sobre todo, que especies podemos introducir para que sexa un sistema sostible.

A pegada do home e a súa influencia na xeomorfoloxía de Galicia

 

Co gaio da celebración do Mes da Ciencia en galego, o alumnado de 1º e 2º de Bacharelato asistiu á charla “A pegada do home e a súa influencia na xeomorfoloxía de Galicia” impartida por Francisco Canosa mediante videoconferencia.

Ao finalizar a mesma tiveron a oportunidade de lle facer preguntas ao conferenciante.

Enlace á videoconferencia: https://www.youtube.com/watch?v=bA2NtI4t9c4